ایشیق افق لرده، سرحددن گلیر
فرح شاد مژده دن، خبردن گلیر
وطن سعادتی، مردانه لیكدن
سعادتدن گلیر، هنردن گلیر


ازل مایاسیدیر، سودا خلقتین
عشقدیر چیراغی ابدیتین
ایتیرمه اومودون، ای انسان اوغلی
وصالدیر آخیری، هجرین فرقتین

داغلاری گزدیم انجاق

تئلیم ده ساری سنجاق

نه قیز اولدوم نه گلین

اودلار دا یاندیم انجاق

گوزلرین آلدی منی
كمنده سالدی منی
گئتمه گئتمه گل گوزل یار
گئتمه گئتمه گل
آمان دیر قویمایین
یار گوزدن سالدی منی
گئتمه گئتمه گل گوزل یار
گئتمه گئتمه گل
قوربان آخان گوزونه یار
نازلا باخان گوزونه یار
یئنه سورمه چكیب سن
ائولر ییخان گوزونه
گئتمه گئتمه گل

یازیرام كوهنه كاغاذلاردا سنی
بوردا هر یئل كی اسیر
سنی مندن آلیری
آپاریر بلكه اوزاقلاردا ایتیرسین آمما
داغلاری چن بورویوب
... سنی یئل لردن آلیر
گتیریر شهریمیزه
بولوتا تاپشیریری
و بولوت لار سنی بیرده
باشیما یاغدیریری

جانیم او تای بو تای

آزربایجانیم

قیش گئدیب یای, یاز گلیب

گؤله اؤردك قاز گلیب

قیفیل‌لاری آشماغا

حسن كلیدساز گلیب.

×

حسن آقا سوستالما

اوراق زاد اله آلما

كلیدین دسته‌سینی

الیندن یئره سالما!

×

عزیزینم قاچ حسن،

تلس حسن، قاچ حسن

دیلیمیز باغلی قالیب

كلید گتیر آچ حسن!

×

عزیزینم گؤتورمه

داشی یئكه گؤتورمه

محكم دوت سال بوینووا

كلیدلری ایتیرمه!

×

حسن وار آ حسن وار

باریشان وار، كوسن وار

یول چینقیللی، داشلیدی

حرامی، یول كسن وار!

×

 ناامید اولما امیددن

میغایات اول كلید‌دن

ائللر حمایت ائده‌ر

دار گونونده ایگید‌دن!

×

امید وئردین ایرانا

مژده قوجا، جاوانا

محاصره‌نی سیندیر

بیر كلید سال زندانا!

×

كؤرپو كئچمز اولماسین

شربت ایچمز اولماسین

انشالله كی هئچ وده

قیفیل آچمز اولماسین!

×

آز بیزه گل گل ائیله

آیاق گؤتور ال ائیله

وعده‌لری ائشیتدیك

رأی وئردیك عمل ائیله!

محمدحسین طهماسب‌پور شهرك(میرزا)

 توپلایان:علـ ﮯ سِئـ،،ـودالـ ـﮯ مـوغـانـلـ ـﮯ

• 
• آتدان اوجا ایت‌دن آلچاق. «یهر».
• آزان چكر ناماز قیلماز, آرواد آلار كبین سالماز. «بئچه».
• آسدی درگاه ایچمه‌لی, اوسدو گؤی اوت بیچمه‌لی. «قویون».
• آلچاق دامنان قار یاغار. «قلبیر», «الك».
• آلچاق قویودان سو شاققیلدار. «قالیان».
• آللاه‌دان آشاغی, پیغمبردن اوجا. «عمامه».
• اوبادا فرمان. «خوروز».
• كندده سولیمان. «كوپك».
• او تای قایا, بو تای قایا, اورتاسیندا شیرین پایا. «گؤز».
• اورتاسی جهنم, دؤره‌سی دریا. «سماو‌ر».
• اوزو توكلو, اوندان اولان توك سوز, اوندان اولان توكلو. «تویوق».
• اوستو اوددو پاریلدار, آلتی سودو خاریلدار. «قالیان».
• اول‌كی مخمل ساتان, ایكینجی پامبیق ساتان, اوچونجو آغاج ساتان. «اییده».
• اون آیاغی‌وار, اوچ باشی آغاجدان دایاغی وار. «خیش».
• بیرقیچی اوسته دولانیر.«قاپی».
• دؤرد دؤوروش بیر قویویا داش آتار. «سوتون ساغیلماسی».
• اویان دووار, بویان دووار, اورتاسیندا مییان دووار. «بورون».
• ایكی داغ‌دیر, آراسی دولو ساری‌ مایا. «یومورتا».
• ایكی داغین آراسیندا بیر یاش ات. «دیل».
• ایلیم ایلیم دویمه‌سی, ایلیم ختیم دویمه‌سی, اونو تاپمایان یئددی ایلین خسته‌سی. «اوزه‌رریك»
• بابام بیر كیلیم آلیب, قاتلاماق اولماز. «گؤی»
• بیر جوت باشماق آلیب جوتلمك اولماز. «اولدوز».
• بابامین بیر ایپی وار, آلابولادیر. «گئجه گوندوز».
• بابامین بیر سورو آغ قوزوسو وار. «دیش».
• بابامین بیر شالی وار نه‌قده‌ر ساریسام قوتارمیر. «یول».
• بالالارین ییغار باشینا آغلار (سیزیلدار). «سماو‌ر».
• بالدان شیرین بالتادان آغیر. «یوخو».
• بو بئله هوت داشی (ال ایله اندازه‌سین گؤستریرلر) یاندیریر داغی- داشی. «ایستی‌اوت».
• بوردان بیر ماما چیخدی, ال قویدو داما چیخدی. «پیشیك».
• بیر اوزون قیزیم وار. گئجه‌ ده گئده‌ر گوندوز ده. «چایین سویو».
• بیر اوزانیر, اوچ قاتلانیر. «بافا, یونجانین بافاسی».
• بیر ایپیم وار ایكی قاتی قویویا چاتـیر, تك قاتی چاتمیر. «ناماز قیلانین اییلیب دورماسی».
• بیر دامیم وار, تك دیره‌یی وار. «گؤبه‌لك».
• بیر دامیم وار یولو یوخ, كؤینگیم وار قولو یوخ. «قبیر» «كفن».
• بیر شئی واردی یئمیشدیم, یئمه‌سئیدیم اولموشدوم, ایندی اولسا یئمه‌رم, یئمه‌سم‌ده اؤلمه‌ر‌م. «آنانین سوتو».
• بیر شئییم وار باشی جهنم, اورتاسی مئشه, آلتی دریا. «قالیان».
• بیر شئییم وار یئریینده بیر قیچی وار اوتوراندا اوچ قیچی. «فورغون».
• بیركم آشیغیم وار, ایچینده بیر ساققا (آشیغین بویوگو). «اولدوزلار ایله آی».
• بیركم آشیغیم وار گئجه سپیب, گوندوز ییغیرام. «اولدوز».
• بیر كؤینك وار گئتسم بازارا آلمارام, آلسام گئیمه‌ر‌م. گئیسم‌ده گؤرمه‌ر‌م. «كفن».
• بیز بیر دسته قیز ایدیك, بیزی ازدیلر, ایپه دوزدولر. «اریشته».
• بیزیم ائوده اوسوب یاتـیب, قولاقلارین قیسیب یاتـیب, بیر داش ووردوم اویانمادی, ائله‌ بیلدیم كوسوب یاتـیب. «موتال».
• بیزیم حیط‌ده قویو وار, قویونون سویو وار, سویونون ایلانی‌ وار, ایلانین گؤزو وار. « پی‌سوز چیراق ».
• پالتارین چیخارداندا آدام آغلار. «سوغان».
• تاپ تاپماجا, قاب آلتداجا. «كوفته».
• چكدیكجه‌ گوده‌لر. «سیگار».
• حاجی‌لار حاجا گئده‌ر, عهد ائله ییب گئجه گئده‌ر, بیر یومورتانین ایچینده قیرخ دنه جوجه گئده‌ر. «نار».
• داغا داشا وورارام سینماز, سویا وورارام سینار. «كاغاذ».
• داغدا تاپپیلدار. «تئشه».
• چایدا چاپپیلدار. «بالیق».
• داغ‌دان گلر داغ كیمی, باغیرار اولاق كیمی. «سئل».
• داغ‌دان گلر داغ كیمی, قول‌لاری بوداق كیمی, اییلر سو ایچمه‌یه, آنقیرار اولاغ كیمی. «نئهره».
• دام اوسته دایلاق اوینار. «دولو».
• دام اوسته ساری یایلیق. «بورانی».
• دولوسو ایله بوشو, بیر وزن‌ده‌دیر. «ناوار- لئنتا».
• زر زره یاپیشیق,زر دووارا یاپیشیق, زر خانیم گلمه‌سه, زر دوواردان آچیلماز. «كیلید و قیفیل».
• ساری‌دی سامان دئییل, یازی‌لی‌دی قران دئییل. «قیزیل».
• ساققالی اتدن, بورنو سوموكدن, گلیردی بنددن, های وئردی كنددن. «بئچه».
• ساندیغیم وار آغزی جفردار, آغزین آچاندا دونیادان خبردار. «گون».
• سیلدیم سوپوردوم حاجی لئیلك گلدی اوتوردو. «جهره».
• شهری قیرمیزی, مردومو قارا. «قارپیز».
• قاپی دالیندا گیزگلی (ساچلی) قیز. «سوپورگه».
• قارا سیغیر گئده‌ر قالماز, آغ سیغیر یاتار دورماز. «گئجه گوندوز».
• قوجا بابام دامدادیر, ساققالی ائیواندادیر. «چیراغین ایشیغی».
• قوجا كیشی داغ‌دان شله ائندیره‌ر. «اوزقیرخان ماشین».
• قویروغوندان توتارام قان قوسار. «چای‌نیك».
• قویروغوندان توتمایـینجاق ائوه‌گیرمز. «قاشیق».
• قیرمیزی اؤكوز یاتار دورماز, گؤی اؤكوز گئده‌ر گلمز. «اود» ایله «توستو».
• كئچه‌دن كومبز, قاپوسو یوخدور. «قارپیز».
• كهر كهر كهر آت, بئلی چؤكوك كهر آت, نه مئیداندا توتولور نه بازاردا ساتـیلیر. «پشه».
• گئده‌ر بوتون یئری گزر, گلر آغزی آچیق یاتار. «باشماق».
• گوده قیلینجیم, دووارا كئچیم. «ایینه».
• گویدن گلیب لام ونان (ل, ن), بیر دسمال بادامینان, نه آغزی وار نه گؤزو, دانیشار آدامینان. «قران».
• گوی‌دن یئره ساللانیر, اوشاغا وئردین آللانیر. «آلما».
• ننه وینكی یاپیشیق, ده‌ده‌ وینكی بیر قاریش. «ناماز قیلان‌دا قیچ لارین حالتی».
• نه یئرده‌دی نه گؤی‌ده, حالقا ووروب بیر یئرده. «دامین اوست باجاسی».
• نه یئرده‌دی نه گؤی‌ده,ظولم جهان ایچینده. «باجا».
• هاپ هاپی, كركی ساپی, بیر بوداغین بئش یارپاغی. «بارماقلار».
• هامی‌‌نی بزه‌ر, اوزو لوت گزه‌ر. «ایینه».
• هانسی قوربانی اولدوغوم‌دی, توكو ایچینده‌دی. «موتال».
• هانسی میوه‌دی‌كی كال ایكن شیرین‌دی, یئتیشدی آجی‌ اولار. «پوسته».
• هرنه‌یی چكسن قیریلار, بونو چكدیكجه اوزانار. «سؤز».
• هور‌ر, هور‌ر, بورنو شیشر. «جهره».
• هینی هینیجه, كورسو بویداجا, دوه‌دن اوجا. «كجاوه».
• یئر آلتیندا آینا گئده‌ر. «گافایین» (گاو آهن).
• یئر آلتیندا اوخلوو گئده‌ر. «ایلان».
• یئر آلتیندا توكلو موتال. «سیچان».
• یئر آلتیندا قانلی كاسا. «چغندر».
• یوخاری گئتسه آشاغی گلمز. «یاش»
• یوك اوستونده پارا فتیر. «آی».
• یونتالدیقجا ایشگه‌لر: «قویو».

• توپلایان : علـ ﮯ سِئـ،،ـودالـ ـﮯ مـوغـانـلـ ـﮯ

سنین یؤخلوغون آنلاییب 

آغلادیم، 

اوزله دیم، 

دومانلی داغلارین باشینا چیخیب 

آدینی سسله دیم

آغلاماق وارسا، 

اوزله مك وارسا، 

نییه منیم یوخلوغومی آنلاییب، آغلامادین، 

اؤزلمه دین...

دئمیه ك-دئیه ك.

ایكیمیزده بیر اؤرك وار ،یاری منده یاری سنده
سئوگی آدلی بیر آغاجیق ،بوداق منده  باری سنده
بیر بولدوق گؤی اؤزونده ،یاغیش منده دولو سنده
عؤموروموز بیر شیرین سئودا ،پتك منده بالی سنده

 ا ی گؤزل سنی دونیایه مقابل توتارام

دونیا منیم اولسا ، سنه خاطیر ساتارام

جئیران اولسام سن داغیمسان

بولبول اولسام سن باغیمسان

سونبول اولسام تورپاغیمسان

سرین سولار سندن آخار

گؤزل یؤردوم آذربایجان

سانما كی، آیریلدین ایتدی بو سئوگی
سن گئتدین سنینله گئتدی بو سئوگی
كؤك آتدی، قلبیمده بیتدی بو سئوگی
سن منیم قلبیمده یاشایاجاقسان
 
سنینچون آچیلار یئنی بیر صاباح
منیمله قالاجاق بو كدر بو آه
اولسان دا اؤزگه‌نین قیسمته بیر باخ
سن منیم قلبیمده یاشایاجاقسان
 
اوزسن ده الینی الیمدن ایندی
بو ال ده، بو جان دا، روح دا سنیندی
سندن آیریلماقمی؟ یوخ بو چتیندی
سن منیم قلبیمده یاشایاجاقسان
 
یاندیردین قلبیمده سؤنمز بیر اوجاق
اود توتوب بو اورك، دایم یاناجاق
اؤلدون حیاتیمدا سئوگیلیم آنجاق
سن منیم قلبیمده یاشایاجاقسان