توركون مارالی

قلبیمه سولطان ، توركون مارالی

ندن گزیرسن ، مندن آرالی ؟

كونلوم اولوبدور ، ای یار یارالی

عشقینه سولطان ، آختارسان منم

دوزلو بیر اوغلان ، آختارسان منم

گؤزل دئیلم ، بلكه گؤزونده

گیزلتمه سؤیله ، بونو سؤزونده

گؤزللیك گرك ، اولسون اؤزونده

گؤزلرن حیران ، آختارسان منم

جان وئرن جانان ، آختارسان منم

قیزیلدان ائویم ، یوخدور دیلداریم

باهالی ماشین ، یوخودا واریم

اورتا قازانجلی ، اینسانام یاریم

حلال چالیشان ، آختارسان منم

خوشبخت یاشادان ، آختارسان منم

اوزلو دئیلم ، گئچم قاباغان

اوپوجوك قویام ، گؤزل یاناغان

اولا محبت ، كونلونده یاغان

سندن اوتانان ، آختارسان منم

تك سنه باخان ، آختارسان منم

مجنون دئیلم ، چوللرده گزم

فرهاد دئیلم ، داغلاری دلم

كرم دئیلم ، دیللره دوشم

سؤزونده دوران ، آختارسان منم

عاشیق دوران ، آختارسان منم

اینانما بیر گون ، دیلیمی آتام

آنا دیلیمی ، اؤزگه یه ساتام

توركو دیلیمه ، باشقا دیل قاتام

یوردونا یانان ، آختارسان منم

وطنه قوربان ، آختارسان منم

شاعیر : وحید شكرزاده

دوشنبه 23 دی 1392
آچار سؤزلر : تورک
بؤلوملر : سئوگی,