گئدیشینی ایزله‌مك،
آتامین سول دیزینده‌كی آغری...
آنامین ایلك دوغوم سانجی‌سینی، آنلاییشیم!
گئدیشینی ایزله‌مك،
آجیماسیز بولدوزر،
من‌سه یول اوستونده كهنه بیر ائو!
گل... داها ساچلاریمی كسدیردیم،
بویادیم سنین اوچون..
قوسورام بیر- بیر، سن‌سیزلیك‌دن گلن بوتون خیانت‌لریمی!
اؤزگه‌سیندن بویلو پیسلیك قادین كیمی!..
آجیقلانما!
قورخما! قادین‌لیغیم سن‌له گئتدی..
باخ!
گؤوده‌مده قاپ- قارا توك‌لر چیخماغا باشلادی!
كیشی‌لر كیمی ساققال‌لاریم اوزانیر..
قیدیقلاییر اوره‌ییمده سنین وارلیغینی!
قیدیغی گلمه‌ین اوشاق كیمی،
قاچیب گئتمیرسن اوره‌ییمدن...
هر گئجه دوشونورم «گؤرن ساققال‌لی كیشی‌لر،
نئجه اورك‌لرینده بیر قادین یاشادارلار؟!»
هی‌ی‌ی‌ی... آقا! دور!
باغیشلا، گؤزلرینده باشقا بیری می وار؟
یوخسا،
من می باشقاسینا چئوریلدیم؟!
هه... گئدیشینی ایزلركن، بیلمه‌دیم؛
قادین‌لیغیم دا سنه قوشولدو!
باغیشلا آقا، سنه یوك اولدو
قوی ساییم سنی یوكسك‌لره درینلیكلردن گئنیش‌لیكله سئویرم! گؤزلریم‌دن اوزاق حیس ائدنده سنی سنه چاتار كؤنلوم! تامام وارلیقلا اینجه‌لیك‌لرین سونودور گونلرین سویه‌سینه سئویرم سنی گونشله شام آراسیندا اولان ان بؤیوك ییخینتیلیق اؤزگور سئویرم سنی ایگیدلرین دوغرولوقلارا شهید گئتمك‌لری تك اونلارین بهشته دؤنمه‌لری تك چیلخا سئویرم سنی آلوو‌لو سئویرم كئچمیش غم‌لریمله بیر اوشاق‌لیق اینانجی تك سئویرم سنی! مندن ایتگین دوشموش سئوگی‌له سئویرم سنی ایتیردیییم قوتساللیقلا سنی نفسیمله سئویرم یاشامیمدا گولوب آغلادیقلاریم كیمی تانری ایسته‌ییرسه سئوه‌جه‌یم سنی اؤلوم‌دن سونرا، داها یاخشی!
اینگیلیسجه‌دن چئویرن: ائلیار خالیقی
سنی نئجه سئودیییمی بیلمك ایسته‌ییرمیسن!؟
قورخورام یاغیش یاغا
پوزا سئوگیلیمین بزه‌یینی
آخی من گؤزل گورموشم سنی
آختاریب تاپا بیلمیرم سورمه چكمیش گوزونو
قورخورام یئریشیندن تانی‌یام.
اوتانام
آغلیام
قورخورام قورخا-قورخا سسله‌یم
یادا دینه بیلمه‌یم
قورخورام دینمه‌یه‌سن چاغیردیغیم سسیمه
قورخورام قولاق وئره‌سن اؤزگه‌سینین سسینه
قورخورام صوبح یوخوسو اولاسان
بوش
یالان
وفاسیز
یوخودا گؤروبدور منی بیر قادین
آغ‌آپ‌باغ بایراغین قانلی گؤلونده
ییخیلیب سیزیلتیم یاتاغین اوسته
بیر دامجی قان دوشوب نظیف بئلینده
یوخودا گؤروبدور گولور گؤزلریم
گون گونو دیندیریر آغ قاراسیندا
چاپیر آیاقلاریم اولوبدور قیرآت
بنؤوشه‌لر بیتیب آت یاراسیندا
اوخشاییرام اونون قوپوز سازیندا
بیر مضرابا، بیر پرده‌یه، بیر تئله
هر طرفیم سؤكوك-سؤكوك اولوبدور
سانكی بیر ماحالی وئریبلر سئله
یوخودا گؤروبدور سؤیله‌ییم دوسلار
بیر قورد چیخیب داغا، هئچ بیلیرسینیز
بو قوردون دیشلری نئچه ایللیكدیر؟
بو قوردو چیكسیز هی سیلیرسینیز!
آختاریب تاپمیشام یالنیز سئودانی
ساغ ﺃلیم سول اله یئتیشیب اوردا
دئییب‌دیر دئییب‌دیر یوخوسون منه
چوخون یازماق اولمور دفتره بوردا
ــ یوخودا گؤروبدور منی بیر قادین
نه بیلیم بلكه ده گؤروبدور سنی
گؤرورم گولورم، گولورسن اوردا
گؤرموشم یوخودا گؤروبدور منی
آنام
آنا‌لارین ان گؤزه‌لی،
سنسن، منیم گؤزل آنام.
ایلیق اسن باهار یئلی،
سنسن، منیم گؤزل آنام.
گونش اوزلو، قیزیل قلبلی،
آغیر باشلی، شیرین دیللی،
ملك‌لرین ائشی سانكی
سنسن، منیم گؤزل آنام.
سن دئدین...
گؤزلرین گؤزلریمه توخونموش
اللرین چیینیمده سانكی بیر دوغوش
“شعرلریم ساچینا تاخیلا‌جاق بیر گون”
سن دئدین...
و من دیكتاتورلوغونو سئودیم
گَلَجه‌یی دوشونمه‌دن
سئودیییمه سئویندیم!
سن شعر یازیردین هر گئجه
تاخیردین ساچلاریمدان
و من كدرلری بیرر-بیرر
بیر-بیرینه هؤرركن قوجالیردیم
قوجالیردیم سنی هر صاباح
و اودا چكیردیم
یالقیزلیق كؤلگه‌سینی ائوجیییمیزدن!
***
“یالقیزلیق اؤلوم‌دور
هر آن
هر زامان
سئودا قاپی‌سی‌نین دؤیونتوسونه اینان”
سن دئدین...
و من دویدوم سنسیزلیییمین زهرلی دادینی
دوداقلاریندان
دویدوقجا قورخدوم
قورخدوم تنها‌لیق توستولندیكجه!
... و هله‌ده
چیغیریرام سنی آنیلاریمدان
هله‌ده
چیچكلنیرسن آیاق ایزلریندن
هله‌ده
تاخیرسان سؤزجوكلرینی ساچلاریمدان
آ...ه شعر یازما‌دان!
سن چیچكلنیرسن
و یارپاقلانیر گنجلیك من ده
قوندارماجاسینا...
یاشام نه‌دیر، منجه؟
قلیانین خورتا خورت خورولتوسو...
توستونون باش آغری‌سی...
باش آغری‌نین گیجلتی‌سی...
یاشام آلییه‌نین گونشده دیلنچی‌لییی‌دیر...
كابارا‌لاردا رقصیله كئچیرتدیغی گونلر...
یاشام ساری پیشیكین دیری‌لییی‌دیر...
اؤلوم‌دن قورتولماسی!
هر ندن سونرا...
یاشام یاشانتیلاری یاشادیب یاشایا یاشایا یاشاماق‌دان....
اكیلمك‌دیر!
یاشام اؤلوم‌دور!
یاشادیم...
اؤلومو دویماقدا!
اؤلمك اؤلمك‌دیرسه...
خورتا خورت‌لو خیریلداماغا نه گلیب‌دیر!؟!
گونشی فیرلادیب یئری ساخلادین
منی ده آپاردین اؤز گئدیشینله
سن منی اؤزومدن گئری ساخلادین
آلدین دفتریمین ساطیرلارینی
یاخشی آپارمادین خاطیرلارینی
اومودلا شارژ ائدیب دیری ساخلادین
سوروردون گونشه گؤردون یانیرام
اریییب گئدیرم یئنه دانیرام
گؤردون كو بیر آزجا چوخ اوتانیرام
یولونو گونشدن بری ساخلادین
سن گونه من سنه گونشه باخدیق
ال اله قول قولا یئنه داریخدیق
اریدیك اریدیك گونشه آخدیق
سئوگیمی بولاقدان دورو ساخلادین
اؤزومو گؤرمه یه قالخیرام اؤزوم
بورایا باخمایا گلمه ییر اوزوم
هئی ... منیم گونشیم منیم اولدوزوم
سن منی اؤزومدن ساری ساخلادین
گره ك آیریلیقین قدرینی بیلم
اومودون هئچ زامان قویمادی اؤلم
ایللرجه گلمه دی گؤزلریمه نم
اللر آغریماسین قورو ساخلادین
دیلسان اوجان
ایستیردیم باشلایام یازام سئوگیدن
یازمامیش دفتری بوروموشدو چن
گل كی آغلاماغا سئویندیییمدن
گؤزومده بیر بولود یاش ساخلامیشام
اومودسوز قالمیشام سنه چاتماغا
یاستیغیم تیكاندیر یورغون یاتماغا
گئدیب گؤل باتشیندا سویا آتماغا
اووجومدا سن ایچین داش ساخلامیشام!
زور نفس چكیرم اؤلمه_دیریلده
آدیندان ساوایی گزمه ییب دیلده
سن گئدن زاماندان بو نئچه ایلده
بیلمیرسن من نئجه باش ساخلامیشام!؟
اوره ییم شان_شاندیر،پتك دئییل كی
خاطیرن دردیمه كؤمك دئییل كی
بو سنم تانیدیغین اورك دئییل كی
كؤكسومده چیرپینان قوش ساخلامیشام!
ایچه ریم دردلیدیر،یوخدور چاراسی
گون به گون درینه دوشور یاراسی
نه قالیب ساچیمین بیر تك قاراسی
نه ده كی آغزیمدا دیش ساخلامیشام!
منی اؤلدوروردو آیریلیق دردی
آنام دورومومو چاراسیز گؤردو
هئی دعا ائیله دی...هئی نذیر وئردی
سنه ده بیر كاسا آش ساخلامیشام!
سنین حؤرمتینه بوش ساخلامیشام!
گلدین بیتدی دونیا یاخینلاشاراق تبریزین قوخوسونو سورویوردو باشماقلارین قاناییردی تبریز و داملا داملا سئلوللاریمدا دوستاقلانیردی وارلیق! گلدین شه هرین قاپسانمیش گؤزلری آیدین لاشیردی آرتیق و تانری قوربان اولوردو قارشیندا و سانكی آنانین یوخوسو چین... گلدین سوسمادان سؤیله دین داریخمالارینی ایچینین سوموك میله لرینی قیراراق سؤیله دین دویغونون اعتیصابیندان و توتولدو دیلین یئنی دن سس سیز سمیرسیز اؤزونه و گئدیشینه تای ... گلدین قانداللانمیشدی آلنین قیریشیقلیغیندا سؤزجوكلر و اولاییردی آغزینین بوم بوشلوغوندا بیر قورد بوز قورد اووووو "من توركم" دئیه!!!
واقع در پـــارس آبـــاد مغـــــان - اصلاندوز
