سن زلفینی آچ تؤك اوزونه ، شانه سی مندن

زنجیری نشان وئر منه ، دیوانه سی مندن



سن عاشقی یاندیرماقا ، من یانماقا ماییل

سن شمعینی گؤستر منه ، پروانه سی مندن



زولفون قدری ، عاشق اولان وار سنه ای گول

سن سؤیله اول مجنونلاری ، افسانه سی مندن



سرمست گؤزون ، فتنه لبین ، نشئه لی باده

ایچدیر منه اول باده نی ، پیمانه سی مندن

تمنا ائت گولوم وئررم یوْلوندا نقد جانیم وار

اگر بولبول ده گیلسه م اوْندان آرتیق مین فغانیم وار



قارا گؤزلر سنی آلداتماسین، بیمارم عشقینده

علاجیم سنده دیر، ای گول، سنه آنجاق گومانیم وار



قبول ائتسه ن یوْلوندا جانیمی یوز یوْل فدا قیللام

اسیر عشقینم، سنسیز بو عالمده خزانیم وار



امانت ساخلا قلبینده همیشه عشقیمین سرّین

حقیقی عاشقم هجرینده چشم خونفشانیم وار



آلوب تئز جانیمی بیر دفعه لیك قورتار اذیّتدن

باخیلسا كؤنلومه عشقینده مین درد نهانیم وار

گئتمه بو نازایله، گؤزه‌لیم، بیر دایان گؤروم

عشقینده من یانان كیمی بیر سن‌ده یان گؤروم

درد اؤلدوره‌ر منی سنی گر بیرده، سئوگیلیم

خائن رقیبلرله گؤلوب اوینایان گؤروم

چشم زمانه‌دن سنه آفت توخونماسین

دائم او قاره زلفی گؤز اوستونده یان گؤروم!

نه لاله بیتمه‌سین، نه ده سونبول، سن اولماسان

نه شاخ گول‌ده بولبول ایچون آشیان گؤروم

مستانه گؤزلرین كیمی سن مست سن هله

چوخ باخما، نازایله، گؤزه‌لیم، بیر اویان گؤروم!

من جهاندا هر گؤزه‌لین دوشسه‌م عشقینه

بیر خیر گؤرمه‌سه‌م ده، گره‌ك مین زیان گؤروم

ای گول، سنی آخر، بیلیرم اویره دن اولدو

سالدین منی هیجرانه، بو بیلمم، نه دن اولدو؟

دوزدوم نه قده ر زحمته، هر نازینی چكدیم

كونلوم غمی - عشقینله اسیرئ - محن اولدو

سن بویله وفاسیزدا دئییل دین، بیلیرم من

ظنیمجه، سنی بو ایشه تحریك ائدن اولدو

رسوایئ- جاهان ائیله دین آخر منی، گئتدین

ایندی منه بیگانه گلیب طعنه زن اولدو

بیر واخت پیشیمان اولاجاقسان بو عمل دن

سندن بو ایشین، بلكه حسابین چكه ن اولدو

گزدین، گوزلیم، غیرایله، من دردینی چكدیم

گلدی نه بلا باشیما، بو غصه دن اولدو

سن گئدندن آرتیق نئچه ایل كئچیب
هله ده اؤزومه گلمه میشم من
قلبیمه آدینی نئجه یازمیشام،
ائله ده قالیبدی،سیلمه میشم من
** ** **
سن گئتمك ایسته دین،من قوجاخلادیم
گئتمه یالواریرام،دئییب ساخلادیم
یادیندامی،او گون نئجه آغلادیم
او زاماندان بری،گولمه میشم من.
** ** **
هز آلیردین منی اله سالماقدان
ایچیمدن سیرریمی بیر-بیر آلماقدان
دئینده قورخورام تنها قالماقدان
قورورلا دئییردین اؤلمه میشم من؟

خلایقدن جفا گوردوم تماماً بی‌وفا گوردوم

وفاسیز آشنالردن عجائب ماجرا گوردوم

جفاسین گورمدیم چوخی بی اعتبار اولدی

تمام دوسلاریم بی وفا اولدی جان گزار گوردوم

كیمه بیل باغلادیم قطع اولدی امیدیم

فقط بیر آشنا دوستومی تك خدا گوردوم

فقط بیر كونلومو ساده و صادق بیلمیشم

ریایی دوسلاری رد ایلدیم رویین دو تا گوردوم

جهاندا قورخما دشمنن همیشه آشنادن قورخ

نه اینكه آشنانون حیله و مكرین خفا گوردوم

هاوا دومان
حالیم توتغون
كوچه - كوچه یاغیش یاغیر شهریمیزه...
نه بیلیم بلكه ده هئچ یاغیش دئییل!
گؤیلر بیر میللتین دردین آغلاییر؟!!!
گؤی اوزره توتولان
قارا بولوتلار
اینان اوره گیمین آهی دیرمنیم...
گؤیلره قالخیب دیر آهیم ، آمانیم
یاغان او یاغیشلار گؤز یاشلاریمدیر
دردیمی - آهیمی گؤیلر آغلاییر!
ائلیم چون چه كدیگیم دردلریم آخی
یئره سیغیشمادان گؤیلره قالخمیش
گؤیلر مظلوملارین آهین آغلاییر

بیر قوجاق گول باغلادیم گوز یولدا گالدیم گلمدین

سن یوباندون انتظاردان سولدی بیر بیر گولریم

تز سولان گوللر كیمی سارالدیم سولدوم گلمدین

باغریما باسدیم سازی سنسیز دونن آخشام چاغی

آغلیب بیر آیریلیق آهنگی چالدم گلمدون

كیمده واردیر گؤزلیم سنده اولان جاذبه لر 

سنه دنیاده مگر عاشق اولاندا غم ائلر؟

بس دیر اولدورمه یه جكسن گؤزلیم دنیانی

هر یوزی گؤیچك اولاندا بو قدر چم خم ائلر

 

اینجیمه گؤز یاشیم آخسا سنی گؤزردوكده گولوم

گول آچیل دیكده باهار فصلی بولود شبنم ائلر

 

ناز وغمزه ن ،یئریشین ،شوخ باخئشین عالم ائلر

بیر ده زولفون اوزه توكسؤن اودا بیر عالم ائلر

حیف سن گزمه یاراشماز سنه بیگانه ایله

او آچیب سرینی دونیایه سنی محرم ائلر

واحدم عمرومو من عشقیله صرف ایله میشم 

عشق یا اؤلدورر اخیر یا منی آدم ائلر

دوران منه قان اوتدوراجاغمیش نه بیلیدیم



بیر گون یاشاماغدان یوراجاغمیش نه بیلیدیم



اولده گوزل صورتیله گونلومو آلدی



آخرده ایلان تك ووراجاغمیش نه بیلیدیم

گئجه آی چیخمیشیدی

منیدیم بیرده او كئچمیش كوچه‌لر

بیرده تمام خاطیره‌لر منله برابر

گینه غملر اورگیمده قالانیردی

گینه سنلن او كئچن خاطیره‌لر یاده دوشوردو

او گؤزل خاطیره لر آیدینا گلدیكجه گؤزومده

آلیشیب اوددا یانیردیم

دانیشیردیم آییلا ، اولدوزایله ، چایلا ، چمنله

اوتوروب سئیر ائله دیم خاطیره لرده ؛

گؤزیاشیم خاطیره لر تابلوسینا باخدی تؤكولدو

سئل كیمی آخدی تؤكولدو گؤزیاشیم