گئدیشینی ایزله‌مك،
آتامین سول دیزینده‌كی آغری...
آنامین ایلك دوغوم سانجی‌سینی، آنلاییشیم!
گئدیشینی ایزله‌مك،
آجیماسیز بولدوزر،
من‌سه یول اوستونده كهنه بیر ائو!
گل... داها ساچلاریمی كسدیردیم،
بویادیم سنین اوچون..
قوسورام بیر- بیر، سن‌سیزلیك‌دن گلن بوتون خیانت‌لریمی!
اؤزگه‌سیندن بویلو پیسلیك قادین كیمی!..
آجیقلانما!
قورخما! قادین‌لیغیم سن‌له گئتدی..
باخ!
گؤوده‌مده قاپ- قارا توك‌لر چیخماغا باشلادی!
كیشی‌لر كیمی ساققال‌لاریم اوزانیر..
قیدیقلاییر اوره‌ییمده سنین وارلیغینی!
قیدیغی گلمه‌ین اوشاق كیمی،
قاچیب گئتمیرسن اوره‌ییمدن...
هر گئجه دوشونورم «گؤرن ساققال‌لی كیشی‌لر،
نئجه اورك‌لرینده بیر قادین یاشادارلار؟!»
هی‌ی‌ی‌ی... آقا! دور!
باغیشلا، گؤزلرینده باشقا بیری می وار؟
یوخسا،
من می باشقاسینا چئوریلدیم؟!
هه... گئدیشینی ایزلركن، بیلمه‌دیم؛
قادین‌لیغیم دا سنه قوشولدو!
باغیشلا آقا، سنه یوك اولدو
قورخورام یاغیش یاغا
پوزا سئوگیلیمین بزه‌یینی
آخی من گؤزل گورموشم سنی
آختاریب تاپا بیلمیرم سورمه چكمیش گوزونو
قورخورام یئریشیندن تانی‌یام.
اوتانام
آغلیام
قورخورام قورخا-قورخا سسله‌یم
یادا دینه بیلمه‌یم
قورخورام دینمه‌یه‌سن چاغیردیغیم سسیمه
قورخورام قولاق وئره‌سن اؤزگه‌سینین سسینه
قورخورام صوبح یوخوسو اولاسان
بوش
یالان
وفاسیز
یوخودا گؤروبدور منی بیر قادین
آغ‌آپ‌باغ بایراغین قانلی گؤلونده
ییخیلیب سیزیلتیم یاتاغین اوسته
بیر دامجی قان دوشوب نظیف بئلینده
یوخودا گؤروبدور گولور گؤزلریم
گون گونو دیندیریر آغ قاراسیندا
چاپیر آیاقلاریم اولوبدور قیرآت
بنؤوشه‌لر بیتیب آت یاراسیندا
اوخشاییرام اونون قوپوز سازیندا
بیر مضرابا، بیر پرده‌یه، بیر تئله
هر طرفیم سؤكوك-سؤكوك اولوبدور
سانكی بیر ماحالی وئریبلر سئله
یوخودا گؤروبدور سؤیله‌ییم دوسلار
بیر قورد چیخیب داغا، هئچ بیلیرسینیز
بو قوردون دیشلری نئچه ایللیكدیر؟
بو قوردو چیكسیز هی سیلیرسینیز!
آختاریب تاپمیشام یالنیز سئودانی
ساغ ﺃلیم سول اله یئتیشیب اوردا
دئییب‌دیر دئییب‌دیر یوخوسون منه
چوخون یازماق اولمور دفتره بوردا
ــ یوخودا گؤروبدور منی بیر قادین
نه بیلیم بلكه ده گؤروبدور سنی
گؤرورم گولورم، گولورسن اوردا
گؤرموشم یوخودا گؤروبدور منی
سن دئدین...
گؤزلرین گؤزلریمه توخونموش
اللرین چیینیمده سانكی بیر دوغوش
“شعرلریم ساچینا تاخیلا‌جاق بیر گون”
سن دئدین...
و من دیكتاتورلوغونو سئودیم
گَلَجه‌یی دوشونمه‌دن
سئودیییمه سئویندیم!
سن شعر یازیردین هر گئجه
تاخیردین ساچلاریمدان
و من كدرلری بیرر-بیرر
بیر-بیرینه هؤرركن قوجالیردیم
قوجالیردیم سنی هر صاباح
و اودا چكیردیم
یالقیزلیق كؤلگه‌سینی ائوجیییمیزدن!
***
“یالقیزلیق اؤلوم‌دور
هر آن
هر زامان
سئودا قاپی‌سی‌نین دؤیونتوسونه اینان”
سن دئدین...
و من دویدوم سنسیزلیییمین زهرلی دادینی
دوداقلاریندان
دویدوقجا قورخدوم
قورخدوم تنها‌لیق توستولندیكجه!
... و هله‌ده
چیغیریرام سنی آنیلاریمدان
هله‌ده
چیچكلنیرسن آیاق ایزلریندن
هله‌ده
تاخیرسان سؤزجوكلرینی ساچلاریمدان
آ...ه شعر یازما‌دان!
سن چیچكلنیرسن
و یارپاقلانیر گنجلیك من ده
قوندارماجاسینا...
گونشی فیرلادیب یئری ساخلادین
منی ده آپاردین اؤز گئدیشینله
سن منی اؤزومدن گئری ساخلادین
آلدین دفتریمین ساطیرلارینی
یاخشی آپارمادین خاطیرلارینی
اومودلا شارژ ائدیب دیری ساخلادین
سوروردون گونشه گؤردون یانیرام
اریییب گئدیرم یئنه دانیرام
گؤردون كو بیر آزجا چوخ اوتانیرام
یولونو گونشدن بری ساخلادین
سن گونه من سنه گونشه باخدیق
ال اله قول قولا یئنه داریخدیق
اریدیك اریدیك گونشه آخدیق
سئوگیمی بولاقدان دورو ساخلادین
اؤزومو گؤرمه یه قالخیرام اؤزوم
بورایا باخمایا گلمه ییر اوزوم
هئی ... منیم گونشیم منیم اولدوزوم
سن منی اؤزومدن ساری ساخلادین
گره ك آیریلیقین قدرینی بیلم
اومودون هئچ زامان قویمادی اؤلم
ایللرجه گلمه دی گؤزلریمه نم
اللر آغریماسین قورو ساخلادین
دیلسان اوجان
ایستیردیم باشلایام یازام سئوگیدن
یازمامیش دفتری بوروموشدو چن
گل كی آغلاماغا سئویندیییمدن
گؤزومده بیر بولود یاش ساخلامیشام
اومودسوز قالمیشام سنه چاتماغا
یاستیغیم تیكاندیر یورغون یاتماغا
گئدیب گؤل باتشیندا سویا آتماغا
اووجومدا سن ایچین داش ساخلامیشام!
زور نفس چكیرم اؤلمه_دیریلده
آدیندان ساوایی گزمه ییب دیلده
سن گئدن زاماندان بو نئچه ایلده
بیلمیرسن من نئجه باش ساخلامیشام!؟
اوره ییم شان_شاندیر،پتك دئییل كی
خاطیرن دردیمه كؤمك دئییل كی
بو سنم تانیدیغین اورك دئییل كی
كؤكسومده چیرپینان قوش ساخلامیشام!
ایچه ریم دردلیدیر،یوخدور چاراسی
گون به گون درینه دوشور یاراسی
نه قالیب ساچیمین بیر تك قاراسی
نه ده كی آغزیمدا دیش ساخلامیشام!
منی اؤلدوروردو آیریلیق دردی
آنام دورومومو چاراسیز گؤردو
هئی دعا ائیله دی...هئی نذیر وئردی
سنه ده بیر كاسا آش ساخلامیشام!
سنین حؤرمتینه بوش ساخلامیشام!
دویدونمو گولوم قاردا سازاقلاردا باهاری ؟
اؤز دؤورونه باخ گزمه اوزاقلاردا باهاری
باخ گؤیده آیا ، فهم ایله قلبینده گونش گؤر
آرزونلا یارات بوز تك اوتاقلاردا باهاری
كؤنلونده باهار جلوه سی یوخدورسا ، ناحقدیر
آختارما نه باغلاردا نه داغلاردا باهاری
بیلیره م یاشاماق چتین دیر چتین
داغلاردان آغیردی سنین محنت ین
یاشا ! یاشاماغا چاتیر جورعتــــــین
سنــین دیر بو گؤزل جاهان اوره ییم
***
دؤیون تك قالمیشـــــام یئرین اوزونده
كیمسه نی گورموره م حاق گوزگوسونده
بوغولور وارلیغــــــیم غم توستوسونده
ای سسی ، آوازی باتان اوره یـــیم
جانیم ، گئجه گوندوز قارا گوزلر سنی گوزلر
یاش توكمه ده بو غصه لی گوزلر سنی گوزلر
قلبیم چمن اولموش بیچی لیر سوزلری هیهات
كونلوم دن آخان نغمه لی سوزلر سنی گوزلر
گورنه كوز اولدوم یاندیردین اوجاغین اودونو
اوددان آخیلان ناز كیمی كوزلر سنی گوزلر
غم چكمه (رها)یازسوزووی قوی غزل اولسون
عاشیقلر آچیر دیوانی سوزلر سنی گوزلر
دئدیم:ای غنچه دهن ،كونلومی قان ایله میسن
دئدی:«بیجا یره عشقمده فغان ایله میسن»
دئدیم:انصاف ایله اینجیتمه منی عاشقینم
دئدی:«گیت،سریمی دنیایه عیان ایله میسن »
دئدیم:آغلاتما منی سرو بویون شوقینده
دئدی:«گوزیاشینی بیهوده روان ایله میسن»
دئدیم:آخر گوزلیم ،باغ و بهاریم سن سن
حیاتیمین ان گوزل لحظه لرین سنلن اولان آنلار یاشادیم ،
منجه سنی سئومك
بوتون گوزللیكلری سئومكدیر...
من سنی ایستی بیر اوركله سئودیم. گوزلریمله یوخ اورییمله سنی گوردوم.
سن دامارلاریمداكی قانا قاریشیب گلدین اوره‌ییمده اوتوردون.
بیر باشقا یئرده اولمازدین .
