گئتمیسن سن قالمیشیق غمده آتا قویموسان بیزلری ماتمده آتا نه قدر یاخجیلیغیندان دئسم آزدی یوخ سنه تای بوتون عالمده آتا آتا جان آلدی الیمدن سنی ظالیم بو فلك گؤز یاشیم سئل تك آخیر دوزموری هیجرانه اورك بیلمه دیم قدرینی من دونیادا اولدوقجا سنین ایندی حسرتله دوزم آیریلیقا منده گرك
آدیمی قلبیندن آتا بیلرسن
اوزاق آرزیلارا چاتا بیلرسن
مندن گؤزلینی تاپا بیلرسن
... منیم تك سئوه نین اولمایاجاقدیر
بیر گون سؤنه جكدیر بو اود ، بو اوجاق
كدر یوواسی دیر بوش قالان قوجاق
دیزینه باش قویوب ، یاتان اولاجاق
باشینا دؤنه نین اولمایاجاقدیر
عؤمرونه بیر سئوگی گلر ، بیلیرم
سن ایله آغلاییب ـ گولر ، بیلیرم
كیمسه سئوینجی نی بؤلر ، بیلیرم
دردیندن اؤله نین اولمایاجاقدیر
سئوگیلیم ! عذابدان اوزاقسان هله
بیر گون ارییه رسن سن گیله ـ گیله
یاناغیندان اؤپه ن اولسادا بئله
گؤز یاشین سیله نین اولمایاجاقدیر
