اولن من اولدیم / دكتر داشقین
سن ده پای اولارسان بیر گون بیرینه
یاران منیم كیمی دوشر درینه
اونوتما ، او گونكو گوروش یئرینه
گلمه ین سن اولدون ،گلن من اولدوم
من سنی تاپاندا ایتیردم اگر
ایتیریم گولوشون كونلومه یئتر
اورتاق دردیمیزی هم ده برابر
بولمه ین سن اولدون ،بولن من اولدوم
من یورغون بیر اصلان ،داغلار یوواسی
سن كیچیك بیر مارال جئیران بالاسی
اوره ییم آغریدان قابارچالاسی
بیلمه ین سن اولدون ،بیلن من اولدوم
داغانیق گورورسن منده هر زادی
گولورسن اوزون گول گولدورمه یادی
یاش گوزلریمیزدن بیر شیریلدادی
سیلمه ین سن اولدون سیلن من اولدوم
سئوگی ساواشینا بیرجه گیریشدیك
اولوم گوزیمیزه باخیردی دیك-دیك
ای ، بوشونا قالخیشما ائتمه گیلئیلیك
اولمه ین سن اولدون،اولن من اولدیم
