نه دئییم ؟
گئتدیم یار گؤرمگه یار قاچدی مندن
بئله بخته ، بئله یارا نه دئییم
یار یولوندا گئجه ، گوندوز بیر عؤمور
او چكدیگیم انتظارا نه دئییم
*****
هیجران غمی ییخدی منی، سورودو
آه چكمكدن حسرت جانیم چورودو
قیش گلمه میش چن داغلاری بورودو
یای چاغیندا یاغان قارا نه دئییم
*****
وورغونویام آل چیچكلی باهارین
دردین آللام آلاگؤزلو نیگارین
ائل یولوندا قوربان وئرن دیارین
فلك چكسه اوغلون دارا، نه دئییم
*****
فرهاد اؤلدو یئتیم قویدو تیشه سین
محبتین كسدی یئردن ریشه سین
كده ر باسمیش غملی كؤنول شیشه سین
گؤرسم اولوب پارا پارا نه دئییم
*****
ائل بدنسه من بدنین جانی یام
داماریندا جوشان غیرت قانی یام
"بارز" دییه ر من صداقت كانی یام
دوزگون عهده،دوز ایلقارا نه دئییم؟
(اوستاد عباس بارز)