اُحِبُّ دئدیم ایت قاپدی منی
بوراخما اللریمی ساتن كؤینكلیم
اردبیل كوچهلرینده ایتَرَم بیردن
یومما گؤزلرینی كتان كؤینكلیم
باخیشینین هاواسی باشیمدا گزیر
***
سسینی توراغاییلار اوخویور
قاتارلار تورموز ائدیر
ماشینلار توی سیغنالی چالیر
سسینی شعیر یازیرام
سسینی سئویشیرم.
- باغیشلایین خانیم سسیزی ایتیرمیشم
سیزین موبایلین نومرهسی زیندانا دوشوب
آدینیز سارایین دؤشلویونون جیبینده گئتدی
چایی توللانا بیلمهدی
عشقه ووردو اؤزونو...
آدینیزی خان چوبان بازار آغزیندا
یئر آلما چؤرك ساتیر.
آدینیزی ایستی سیمیشقا چیرتداییرام
آدی نه ایدی... سیزین؟؟؟
هه كلاسیك شعر، فلاش فیكشن
یوخ آد سیغمیر ادبیاتا
سسیزی یاشاییرام سادهجه
آخی سئللولوم كیچیكدی بیر آز
سیز سیغیشمیرسیز
یومروغومدا یئرلشن قلبیمه
یومروغوم آچیلسا
بوتون قزئتلر خبردن داشار
داشماسایدی آرپا چایی
داشما... داش...
***
سسینی یاشاییرام اردبیل كیمی
سسینی "سحر"
"سحر- سحر باغا گیردیم"
باغیشلا خانیم "پیراتملیكدن بالیخلی"یا نئجه گئدیم من؟
آخی ساوالانی آشماغیم گلیر
سیزین سسیزی چوخدان گؤرموشم
تئلفونوز زیندانا دوشموشدو مننن
خوشوم گلیردی آدینیزدان
آدی نه ایدی... سیزین؟؟؟
تئلفونوز دیلیمین اوجوندان
صیفیردن باشلانیردی
سیزینله "یاشماق"یم گلیر
یاشاماق ...
یاشاماق اولار
بو شهرده پولسوز؟
- كیم دئدی من اؤلموشم؟
هانسی یوسف خیال اوغلو؟
آی ائششگ اوغلو!
- سارایین دالییجا گئتمیشدیم
قورخومدان چایی توللانانمادیم!..
- كیم لووا وئردی منی؟
من بارالاریمی ییغیشدیرا بیلمیرم خانیم
بوردان قبریستانا نئچه اؤلو سیغیشار؟
یانی دیریلر نئجه كئف چكیرلر ائهمال-ائهمال
بوردان ساوالانا نئچه ؟...
گؤزلدی ساعاتیز
سوییسدی كوردوستان؟!.
یانی دئییرم من ساختا قلبدن باش چیخاردیرام
اللریزی وئرین الیمه
لوطفن
منی بیر یئره گؤتورون
خستهخانایا
ائوینیز یاخشیدی البتّه
نومرهزی آلیب قاییدارام
سسیزی ایتیرمیشم اینشیلدن
بوراخما اللریمی نه اولار
"سسین گلسین ساری بولبول"
منه بیر آدرسجیك سسین گلسین.
- سیزین ائوه هانسی پلاك لازیمدی؟
هانسی خیابان، منی فخری خیابانیندان
سیزه گتیرر ؟
هانسی اوتوبوس؟
اوزوزو چؤندَرین گونشه
بیر - ایكی - اوچ
تولازلانین منیمله دلیلیگی
سارای توللاندیها... قاداسی...
بس اوندا نومرهزی وئرین
بیر شاعیر سیزی شعیرلندیریر
- من آزمیشام خانیم ناز
منی ائویزه،
پولیسه
آپارین.
نومرهسی نه ایدی؟
ائویزین! قاپیسی! پولیسین !!.
دانیشین موبایلیم سسیزدن دولسون
بولوتوث ائدین اؤزونوزو لوطفن
باش اوسته یومدوم گؤزلریمی!..
"سسین گلسین باری بولبول"
***
من عاشیقم وطن یاخشی
گئیمهیه كتن یاخشی كؤینك ایستهمیرم
من سیزی گئی....یئمك ایستهییرم
آجام
اللریزی یئمهرم واللاه...
***
قاشسیز اوزویومون قاشلیسیندان
جیبیمده اولسایدی
بارماغیزا نه یاراشیر اوزوك
یوخدو منده اوز...
یانی دئمهلی سیز هارالیسیز؟
شورابیل سیزه اوخشاییر
سیز یوخ...
آخی تربیهسیزدی آتلاری
آغ بالیقلاری آنجاق
یانی سیز آغ بالیق
نئور گؤلو سیزدن
سیز گؤزلسیز دئییرم مطلق
گئرچكدن
***
اللریمی بوشلاساز، اللریم تؤكولر هاااا
كیم ییغیشدیراجاق بو سویوقدا
بو قدَر سئوگی بارماقلارینین ایزلرینی.
دئییرم هادیر اولون
من الیزده قالارام
قالسام دا كی "پنجرهدن داش گلیر"
آی سانسور ائتدیم بیر آزین
"آللاها دا خوش گلیر"
آی منه بیر زنگ ائله...
***
منی راپور وئرمه گؤزلرینله
داما وئردیر دامسیزام
سند گتیر آدامسیزام
سن كی زیبا كرباسیدن ده گؤزلسن
نازپریدن ده، هم ده...
گؤزوم گؤزونون اویونجاغیدیر
بوراخما
بوراخما اللریمی نه اولور
اردبیل كوچهلرینده ایت قاپار منی
سسله آدیمی سسله
من؟ من؟
من گونش اوغلویام خانیم سن آی ؟
آدینیز دیله - دیشه گلمیر
آدی نه ایدی سیزین ؟؟؟
من سیزه گئدیرم
سیز هاچان گلیرسیز منی قوناق ؟!.
من.... من..... من.....
نه دیلنن دئییم جوجهم
آی لاو یو آی آی
اُحِِبُ اُحِِبُ اُحِِبُ یا حبیبی
قیزا سئوییوروم سِنی
بالالی....
گئتمه...
دایان...
دور...
به ائششهیین قیزی
آخی سئویرم سنی...