هردن سوزه – سوزه سوزولوب آخار
هردن سلطان كیمی دانیب باخار
گاهدان اوره ییمی یاندیریب یاخار
یامان گیلئلی دیر مندن گؤزلرین
بعضاً آغلار ، بعضاً گولر اوزومه
دوداغیمدا فیكیر وئرمز سؤزومه
اوخ كیمی سانجیلار بیردن گؤزومه
یامان گیلئلی دیر مندن گؤزلرین
بیر آز اوتانجاق دیر بیر آز دا شیطان
دیلین بالدان شیرین دوداغین خندان
ییخیب بخت ائویمی ، ائدیبسن ویران
یامان گیلئلی دیر مندن گؤزلرین
یئنه گؤزلریوه دولدورما یاشی
قاپساما كیپریكین ، چاتدیرما قاشی
اینان كی گؤز یاشین اریدر داشی
یامان گیلئلی دیر مندن گؤزلرین
(بابك قوجازاده)
