منی باغیشلا
(قاشقای توركجه سینده)
شعر: ارسلان میرزایی
آیریلیب گئدنده بو اوزاق یولو
دالینگچا گلمه دیم منی باغیشلا
من سنی گؤزه‌لیم گؤزلریم نورو
تانییب بیلمه دیم منی باغیشلا
بو یوللار گؤتوروب آپاردی سنی
آپاریب محنتدن قوتاردی سنی
اوره‌گیم چوخ گزیب آختاردی سنی
تاینگی بولمادیم منی باغیشلا
ترپندی دوداغینگ ملك خویونگدا
بالیق كیم توردایدینگ آستا بویونگدا
شانلیگینگ چاغیندا سنینگ تویونگدا
آغلادیم گولمه‌دیم منی باغیشلا
روزگار بئلمه فورصت وئرمه دی
تا عومور آلمادی عبرت وئرمه‌دی
غوروروم الیمه رخصت وئرمه‌دی
یاشینگی سیلمه‌دیم منی باغیشلا
آیریلیق چاغیندا دئدینگ گله رم
گلمه‌دینگ قدرینگی ایندی بیله رم
اؤزوم اؤز یانیمدا دئدیم اؤله‌رم
من سن سیز اؤلمه دیم منی باغیشلا
زومار (آذر) آیی-90 شیراز