یاواش- یاواش
شعر:تورك اوغلو
یاواش- یاواش
عاشیغام اؤلدورمه انصافین اولسون
آلساندا جانیمی آل یاواش- یاواش
گل اوتور یانیمدا یانیر اوره‌ییم
قولونو بوینوما سال یاواش- یاواش
گل چیخاق چمنی سئیر ائد‌ك قوشا
اغیارین اوره‌یی چیرپیلسین داشا
من سرو قدینه ائدیم تاماشا
سنده اؤز سازینی چال یاواش- یاواش
سئومیشم گلنده سنی، بولاقدان
عطرینی آلارام گؤرسم اوزاقدان
گل باسیم باغریما اؤپوم یاناقدان
سوروشسون باشیندان شال یاواش- یاواش
«تورك اوغلو» سئویله‌ییر دوشدوم دیللره
منی مجنون ائدیب سالدین چؤل‌لره
سئوگیلیم قولاق آس بونیسگیل‌لره
دوشدو اوره‌ییمه خال یاواش- یاواش