آچین آققیشقالاری
شعر: اوستاد هوشنگ جعفری زنگانلی
هاوالار تك اوره گیم دولغوندور
قورویان داغلارا یاغماق دیله ییر
سئل اولوب ظالیم ائوین ییخماقا آخماق دیله ییر
ایلدیریم تك گئجه باغرین یارا شاخماق دیله ییر
آچین آققیشقالاری!!!
منه یوخ......
قفس غمده قناریلره بیر رحم ائله یین
بیر گولون سولماسینا سولمامیشام
قلبیمین دولماسینا دولمامیشام
قورخورام توستو وورا گول خانامی
آچین آققیشقالاری
بیر گوروم اولكه م آرا بیرلشن ائللر نئجه اولوب؟!
كوچه لرده یوموروق توسپورو بایراق اولان اللر نئجه اولوب؟!
بیزیم ائللر نئجه اولوب؟!
آچین آققیشقالاری
بو نه ائودیر كی ایشیقلیق یولو یوخدور!!!
بیلمیره م قبله م هایاندیر؟؟؟
ائویمین ساغ سولو یوخدور
بیرینی بغض توتوبدور دانیشانمیر
بیری بیر شیردی دوشوب دار قفس ایچره، چالیشانمیر
آنا ایستكلی بالایلان باریشانمیر
ایكی تورپاق قاریشانمیر
قول بویونلا ساریشانمیر
آچین آققیشقالاری
ائله بیل كی قولاغا وای سسی گلدی
آنالار قالمیش اوغولسوز
" اوغول ای وای !" سسی گلدی
دئیه سن های سسی گلدی
یا گورن قانلی بئشیك اوخشورو لای-لای سسی گلدی
قاپی تاختا-دالی سالغین
پاجا باغلی - سسیم آرغین
نه گئدیر سس
نه چیخیر های
اولدو كال كلمه لر اوسته امگیم زای
وای یاساق دیللی ائلیم وای
وای یاساق دیللی ائلیم وای!
-------------------------------
آققیشقا(پنجره)