گؤزلیم عاشیقینی سالما نظردن
حسرتیندن اؤلورم، گل بیزه هردن
سنه چوخدان وورولوب بو دلی كؤنلوم
نئیله ییم كی خبرین یوخدو خبردن
گل منه ناز ائله مه آی دلی جئیران
او قارا گؤزلرینه اولموشام حیران
بیر دؤنوب باخماق ایله جانیمی آلدین
منی مجنون ائله ییب چؤللره سالدین
من ایناندیم سنه، اؤز كؤنلومو وئردیم
منی آتدین گئدیب اغیار ایله قالدین
گل منه ناز ائله مه آی دلی جئیران
او قارا گؤزلرینه اولموشام حیران
سن گزیرسن گؤزلیم غیر ایله من سیز
یوخو گئتمز گؤزومه بیر گئجه سن سیز
اؤزون اینصاف ائله ای سئوگیلی دلبر
هانسی بولبول یاشایار باغ و چمن سیز؟
گل منه ناز ائله مه آی دلی جئیران
او قارا گؤزلرینه اولموشام حیران
شاعر : علی آغا واحد
