گلمیشم اوتاقینا اویادام سنی
قاراگیله ، اویادام سنی
نه گؤزل خلق ائله ییب یارادان سنی
قاراگیله ، یارادان سنی
گؤتوروب من قاچارام آرادان سنی
قاراگیله ، آرادان سنی
قئزیل گول اسدی
صبریمی كسدی
سیل گؤزون یاشین قاراگیله
آغلاما بس دی
تبریزین كوچه لری دولان با دولان
قاراگیله ، دولان با دولان
اگر منی سئومه ییرسن گت آیری دولان
قاراگیله ، گت آیری دولان
نه منه قئز قحط دیر نه سنه اوغلان
قاراگیله ، نه سنه اوغلان
آغاج اولایدیم
یولدا دورایدیم
سن گلن یئره قاراگیله
كولگه سالایدیم
ائویمیزین قاباقی سو گلن آرخ دی
قاراگیله ، سو گلن آرخ دی
دوروم چیخیم ایوانا یار گلن واخت دی
قاراگیله ، یار گلن واخت دی
یاریم گلیب چیخماییر اوقاتیم تلخ دی
قاراگیله ، اوقاتیم تلخ دی
دربند آرالی
كونلوم یارالی
بیر یار سئومیشم قاراگیله
ائل لر مارالی
