من ایندی
عاصی بیر كولك
ایشیق آراركیمی‌یم
دیب‌سیز قارانلیق‌لاردا
بیر باشینا باشسیز كیمی دولاندیغیم
آینالارسان، سولارسان، چیچك‌لرسن
یاشات منی منه و بایقوشلارا
سوورولان قوملارام دا كولك‌لرده
كولك‌لرم ساچلارین‌لا اؤپوشن
و تنهالیغام بیرباشینا یوخلوغونلا سئویشن
سن
سون نفسیمده‌كی آن قده‌ر غملی بیرحیس
دالغالارین سیغینامادیغی بیر لیمان
زامان سیلنمه‌دی آینالاردان
گؤزلرینین آیاق ایزلرینی
بو یالقیز قالابالیق‌لارا
بو قالابالیق یالقیزلیق‌لارا یاتمادی اوره‌ییم
اوره‌ییم گؤزلرینه قاچقین
اوره‌ییم
زامانین مفتیللی سیم‌لرینده آسیلی
قورتار منی نه اولور
قورتار بو دوعالارین قارغیشیندان
بیر بارداق
گیلاس شارابی كیمی باشینا چك
تبثومونده‌كی لوطفونه سیغیندیریب
دؤشلریندن ائیدیر
بو جیلیز اومودومو
قییما آرتیق
قارانلیغین ایشیغینا اوتوران بومنه
قاراباغ شیكسته‌سی اوخویان بایقوشلا
یئتمیش میلیون قصورلا یاشاییرام بورالاردا
دَیمه قوی بو آجی‌دان سونرا
دنیزلری آنلاتسین منه گؤزلرین
باخ‌سانا بو داغلار، سولار و گؤی اوزو
سئوگی‌نین اَل یازماسی‌دیر جانلیجا
چایلار دنیزه كؤچورور اولدوزلاری
و دنیزین چیینینده‌دیر
بوتون یاشام آغیرلیغی
دنیزلر گولوشلرین قده‌ر دونیا
گولوشلرین دونیا قده‌ر خزه‌ر
اسگی بیر یئل دَییرمانیندا دئییل
بوز‌قیر بئیین‌لرده ایتیردین
او معصوم گولوشلرینی
شعری بیتیریرم داها
آنلاسانا
آنلاسانا نه اولار
سئوگی دئیه
آنلادا بیلمه‌دیییمی...
