چاره سیز دردیله داغلاندیم من
نه منیم دردیمه درمان اولاجاق
نه بو عشق عالمی بیر یان اولاجاق
گرك ای عاشیق سرگشته یاناق
چاره سیز دردلره دوشدوك ایناناق
غصه دی غم دی بیزیم عالمی میز
ئوزگه عالم دی بیزیم عالمی میز
بورا یالنیز یول آچار عاشیق لر
یول آچانماز بورا تزویریله زر
بوردا عاشیق نه می ایستر نه ملك
قالماز عاشیق ده نه آرزی نه دیلك
ایسته سن یول تاپاسان اؤلكه میزه
قاتاسان طالعیوی سنده بیزه
قالمیا سنده نه آرزی نه دیلك
دینله نئی دن كی دئییر اوندا گرك
وئره سن قلبیوی جاندان كئچه سن
باده ی فقر و فنادان ایچه سن
یاناسان شمع كیمی باشدان آیاقا
دؤنه سن داغ كیمی سینماز دایاغا
قویاسان باشیوا عشقین تاجینی
داداسان هم شیرینی هم آجینی
یاراسان ظلمتی بیر نور اولاسان
منه تای شعر اولاسان شور اولاسان
توتاسان عشق مقامینده قرار
گؤره سن پرده نین آردیندا نه وار
(1368-فروردین آیی/عقیل مورادی ائلدار)