تانیدیم، دؤنیانین هر اؤزؤنؤ من،
قورخاق گئجه سینی، گؤندؤزؤنؤ من،
سئچدیم اینجیسینی، ایلبیزینی من،
اؤزومو تانیا بیلمه دیم، آنام.


آنلیما یازیلان طالعی گؤردیم،
باشیمدا فیرلانان اله یی گؤردوم،
منه بیج-بیج باخان كله یی گؤردوم،
گؤزؤمو تانیا بیلمه دیم، آنام.


نئچه یاتمیشلاری اویاتدی سؤزوم،
هر كولو چینارا تای توتدو سؤزوم،
بزه نیب اؤستومه قاییتدی سؤزوم،
سؤزومو تانیا بیلمه دیم، آنام.


یئرسیزی ساخلادیم گؤزومون اؤسته،
چوخونا یئر وئردیم دیزیمین اؤسته،
او قدر ایز دؤشدو ایزیمین اؤسته،
ایزیمی تانیا بیلمدیم، آنام.


كدره سیرداشدی، تانیشدی گؤزوم،
من سوسدوم،
                    سؤزومی دانیشدی گؤزوم،
من اؤزلو گؤرمه یه آلیشدی گؤزوم،
                                اؤزومی تانیا بیلمدیم آنام!

شنبه 26 مرداد 1392