سن اونوت دئمیشدین
منده اونوتدوم ...
یاشاتدیق اؤمورده نئچه سوالی
دوستلارین «نییه»سی جاواب سیز قالدی
جسارت ایستردیم ایچه سوالی
او نه منده اولدو
نه سنده اولدو
بیر آخشام اللرین گؤیرچین كیمی چیخدی الیمدن
باهارا بو شاختا هاردان دوشدو،
چمنلر سارالدی، گوللر بوزوشدو
آتیلدی دیلیمدن «قاییت!» نیداسی
سن اوندا كولك لر آپاران قاییق-
منسه تنها قالان حسرت آداسی .....
اوزاقدا دئییلدین،
یولون بیر آددیم
ووقاریم قویمادی بیر آددیم آتیم
سن ائله بیلیرسن قورتاردی هر شئی؟
سن اونوت دئمیشدین
منده اونوتدوم ؟؟؟!!!
