داریخیر خیالیم ! روحومو یاخیر
باغیریر سكوتلار فریاد لار اوسته
غرورون اوزوندن حقارت یاغیر
باغیریر سكوتلار فریاد لار اوسته
بوغولور حسرتدن دیلیمده سوزوم
قوشا بولاق تك دولوبدور گوزوم
اوزومو گورمگه یوخومدور اوزوم
تئشه لر یاغیرلار فرهادلار اوسته
باغیریر سكوتلار فریادلار اوسته
توپراقلار تیتره ییر بوز داماریمدا
اولدوزلار چیرپینیر سولوم ساغیمدا
اوزانیب قالمیشام زامان یولوندا.
آی دا چابالیری توپراقلار اوسته
باغیریر سكوتلار فریادلار اوسته
اولدوزلاری ساییب آیا چاتمیشام
سوسموشام سوسموشام ، هایا چاتمیشام
گئجه نی سورویوب گونه قاتمیشام
دوداقلار تیتره ییر دوداقلار اوسته
باغیریر سكوتلار فریادلار اوسته
گولملی گولملی آغلایان منم
داغلار اوره گینی داغلایان منم
سوكوتو هارایا باغلایان منم
وولقانام مسكنیم بو داغلار اوسته
باغیریر سكوتلار فریادلار اوسته