خاطیرات دفتریم دورور قارشیمدا،
دولاشیر بیر اؤلمز سئودا باشیمدا.
گؤزل قاراباغدا جاوان یاشیمدا
بیر گؤزل سئچدیگیم یادیما دوشدو.
گزدیك قاراباغی قولوم قولوندا،
واریمی، یوخومو گؤروردوم اوندا.
بو شاعیر قلبیمله اونون یولوندا
مین درده دوشدویوم یادیما دوشدو.
كؤنلومون آرزوسو، دیلیییدی او،
نازلی ملكلرین مَلیییدی او،
گؤزومده گؤیچكلر كؤیچیییدی او.
بونا آند ایچدیییم یادیما دوشدو.
او مندن خبرسیز كؤچدو یایلاغا،
بختیمدن نیگاران، سوراق- سوراغا.
قلبیمده ایلك یارا، یار كؤچن داغا
ییغیشیب كؤچدویوم یادیما دوشدو.
اوچدو بیر سونا تك؟ عشقین گؤلوندن،
آدی بو عاشیقین دوشمز دیلیندن
عیسا بولاغیندااونون الیندن
سو آلیب ایچدیییم یادیما دوشدو.
مندن اوزاق گزدی ندنسه آمان،
آیریلیق اؤلومدن یامانمیش، یامان.
هر گون ائولرینین لاپ قاباغیندان
تیترییب كئچدیییم یادیما دوشدو.

( سولئیمان روستم )

جمعه 11 مرداد 1392