آمان آللاه یئنه شیطان گلیب ایمان آپارا
قورویون قویمایون ایمانوزی شیطان آپارا
منیم انسانلیغیمین گور نه حصاری یاوادیر
كی گونوز غول بیابان گلور انسان آپارا
خرمنی ساققیزا وئردیك نه یامان چرچی دی بو؟
هی گلیر كنده بیزه درد وریر درمان آپارا
چورگ آلمیش الینه آج نئجه طاقت گتیسین؟
ائله بیر یاز گئجه سی قیز گلیب اوغلان آپارا
قانلی دیرناخلاریلان(انگلیس)ال قاتدی بیزه
باخیسان (روس)دا آرازدان كئچیر ایران آپارا
آرادان بیرده بولسه لر بیزی اربابلاریمیز
قورخورام قیمیالار تبریزی تهران آپارا
قارا طوفانكی داخی خلقله شوخلوق ائله مز
سئل گرك ائل داغیدا ائو ییخا ایوان آپارا
بو قارانقلیق گئجه لرده قاپوموز پیس دوگولور
نه بیلیم بلكه اجل دیر دایانیب جان آپارا
آناملا سویله یین اوغلون ییخیلیب سنگرده
تئللرین باس یاراما قویما منی قان آپارا
سلقه لی اوغرو تاپیلمیشسا بو باشسیز یئرده
شهریارداندا گرك بیر دولی دیوان آپارا

جمعه 11 مرداد 1392
آچار سؤزلر : شهریار