XXXXXXXXXXXXXX

سنسیز اوره ییمده نغمه لر قالیب

سن یوخسان باشیمدا خاطیرن قالیب

اللریم الینه یامان داریخیب

گلسنه بورادا گؤروشه ریك بیز .

 

ائله سنسیز گزیرم

بو خیاوانلاری

دئیه سن ازلدن

بیر «سنیم !» یوخموش

كوچه ده ، شهرده منه داریخیر

قاپی لار باغلیدیر ، تانیشیم یوخدور ...

 

ائله سنسیزم بو آخشام یامان

تبریزده حالیما اوخشاییر سانكی

سن گئتدین دالینجا اینان سئوگیلیم

ایشیق سیز گؤزلریم تامارزی قالدی .

 

یوللار چاغلایاردا ، آیری دا سالار

حیات بویوندا مین ایفاده سی وار

سئوه نی سئوه نه وئرسه ده آنجاق

یوللارا تامارزی باخانلاردا وار

 

حیات نه غریبه

دونیامیز یامان

منه ده ، سنه ده قیسقاندی تانری !...

شهر منیم چون بیر قارا دوستاق ،

یوللار عزرائیل تك آلار جانیمی .

 

لاپ بئله قاییتماق ایسته مه سنده

منیمسه گؤزلریم یوللاردا قالار

بو اوجا بینالار آراسی منیم

گؤزوم سئوگیلیمین آددیمیندا قالار ...


XXXXXXXXXXXXXX

 

سه شنبه 8 مرداد 1392
آچار سؤزلر : سنسیز
بؤلوملر : سئوگی,