آیریلیق نغمه سی
گولوشلریم دونوب قالدی اوزومده
گوز یاشلاریم بوز باقلادی گوزومده
سوز ورمیشن من قالمشام سوزومده
سن سه منه وفاسیزلیق نیلدی ؟
من یولوندا داغدان آخیب چای اولدوم
قارانلیخدان سنن اوتور آی اولدوم
اوشویوردون قشدا سنه یای اولدوم
سؤیله گوروم سن منیم اوچون نیلدین ؟
سندن اوزاق چیخیب گئده بیلمیرم
بو آیریلیق نغمه سینی سئومیرم
سن دونیامسان دونیانی من نینیرم
سوگی دولو دونیامیزی نیلدین ؟